Pumpele Paors
              't weer met Vastelaovend    callepin    gastebook     kontak    nuits   thoes



 

Dinsdag 9 fibberwarie 2016

Kerteer veur twie is 't noe. Dreuveg weerke es iech zoe naor boete loer.
Meh jeh, de kins neet alles höbbe in 't leve.
Boe op hiel väöl plaotse boete Mestreech 't hiemelwater toch behuurlek umlieg kaom, bleef 't bij eus druug, alweer.
Jeh op ei niks veurstèllend buike nao daan.

Twie manjefieke daog gehad mèt e zönneke en e bitsje wind. Vastelaovend 2016 kin eigelek al neet mie kepot.
Veer mer ouch 't volk langs de rót heet genote vaan euze Groete Femiliegróp.
Mèt zoeväöl klein kinder in al die prachtege kojtse, geweldeg.

Patrick van de Weijer, 't Microfeunsje, deeg weer verslaag vaan de Groeten Optoch. Zoe wie v'r dat vaan häöm al jaore gweend zien, ouch noe weer sjoen wäörd veur Pumpele Paors. De cameramaan leet zeich ouch vaan ziene beste kant zien en pakde eus oetgebreid in beeld. Oonder aon de Aw Maosbrögk zoe haafweegs naor de Vriethof.
Oonder aon de Helmstraat krege eus allerkleinste e spengkse opgestoke door 'nnen Tempeleer. Sjiek toch.

Met nog ein boch te goon zouwe v'r daan veur ziene Hoegen Hoeglöstegheid langsloupe, zègk mer 't hoegtepunt vaan de cortège. Eus laote zien aon de Prins.
Veur eus oet ginge de Keemeleers oet Wieck.
Jeh en daan wètstet al, die bepaole zelf wel wie lang ze blieve stoon.
Enfin wie die oet gedinges waore, stoond de Prins zien blaos op springe. Effe plasse.
Iech begriep dat. Dat is jummers ouch 'nne mins.
Veur eus toch 'nne anti-climax, oondaanks de vrunteleke wäörd vaan d'n Tempeleer dee de Prins verexcuseerde en eus vertèlde dat de Prins zien vrouw 't evekes euvernaom.

Oondaanks eus begrip, mer daor waor 't eus neet um te doen.
Stèl diech ins veur tot veer veur de Keemeleers hadde geloupe en veer hadde zoeväöl tied gekrege es de Keemeleers krege, zouw Bastiaan I daan ouch zien goon plasse es de Keemeleers aon de beurt waore???

Iech dach 't ech neet.
Dikke gemisde kans.

Zoe is 't en neet aanders, jaomer.

 

Zoondag 31 jannewarie 2016

Mèt nog ein week te goon, zien de veurspellinge gèt beter oet.
Ut blijf evels twiefelechteg.

Aofwachte en beie....

 

 

Vriedag 29 jannewarie 2016

Vriedagmiddag........bekans weekend.

Teminste dat dink 'nne gewoene werkmaan zoe roond ut middagoor op vriedag.
Ut is neet veur ederein weggelag um op vriedagmiddag zoe tege twelf oor de Stokstraot in te sjókke op weeg naor de Karkol.
De lèste jaore e bitteke traditie tot Truus mèt e paar zier deskundige begeleiiers (zoepers) present zien bij ut oetrope vaan de nuie prins of prinses vaan de Karkol.

Noe mot iech zègke este zoe in de negetegste levensjaor zits, daan höbste aoventouw e verzétsje nudeg.
Vendaog waor 't weer zoewiet.
Gelökkeg höbbe v'r de foto's nog. Kiek hei of via printebeuk


Goonsdag 27 jannewarie 2016

Es dat mer good kump.........Jao dat kump good.

En v'r zien oonderweeg, nog oonderhaaf week te gaon.
Hawwe v'r 't druug of neet. 't Ierste weerberiech is bekind.
Ein vaan de vraoge die noe nog gei good antwoord heet. Mer dat is 'n kwestie vaan tied. D'n tied zal 't liere. Es 't lèste model vaan vendaog bekeke weurt, stump dat tot einege zörg.

Vaan d'n andere kant, es dat 't einege is wat tot zörg stump, nou jeh daor zien aander zakes die belaankrieker zien en die tot mie zörg stumme.

Euze Noud, toch eine vaan de jongste leie, heet eus dees daog flink laote sjrikke.
Zoe zuuste mer tot ouch 'nne (kleine) mins zoe veranderlek kin zien wie 't weer.
Vendaog sjijnt 't zönneke, mörge duuster wolke.....mer ouch die duuster wolke losse op.
Mèt de zjuste medicijn hope v'r tot heer weer gaw aonsterk, heer heet nog oonderhaaf week. Eigelek zjus wie 't weer. De verandering kump op tied, let op.

Ut kump good.

 

Zaoterdag 16 jannewarie 2016

Dát wèt geine mins..........mer dát wèt ederein

Daor kin me 'n hiel blaad mèt vraoge euver völle.
Daor zien vraoge boe gei antwoord op is. Iech geef get veurbeeldsjes.

'n Vraog die eder jaor roond dezen tied altied gestèld weurt, is:
Wie zouw 't weer zien mèt de Vastelaovend?
Dat wèt geine mins.

Wat ouch altied weer gevraog weurt, is:
Mèt wieväöl goon v'r dit jaor de Groeten Optoch in?
Dat wèt geine mins.

Welke nómmer zouwe v'r höbbe in d'n Optoch?
Dat wèt geine mins.

Zouwe v'r genóg draank en hepkes höbbe veur de drei daog?
Dat wèt geine mins.

Zouwe v'r weer genóg bezeukers kriege aon de kaar die eus good helpe mèt alles op te kriege?
Dat wèt geine mins.

V'r höbbe daor allemaol wel eus eige gedach euver, mèr perceis, nei Dat wèt geine mins.

Wat v'r wel allemaol hiel zeker weite dat is tot v'r zoondag 7 fibberwari zoe roond haaf twelf mèt e paar maan riechting Vriethof goon um 't kanon en daomèt de Vastelaovend in te sjete.
Dit jaor mèt e speciaol rendsje. 't Mooswief kump aon 'nne spiksplinter nuie paol te haange, mèt 'n nui kabel. Daor goon de Tempeleers en hoeg ambtenere vaan de gemeinte Mestreech neet zoe mer aon veurbij, nei.
Daor zal op gepaste toen stèl bij weure gestande. Höb hure flustere tot d'r nogal gèt hotemetote zien oetgenudeg um dat vaan hiel kortbij mèt te make.
En jao, daor is ouch eine vaan eus bij oonder de genudegde. Zal hei gein naome neume, mèr heer drink geinen alcohol. En, neet onbelaankriek, h'r maag zien ganse femilie mèt numme.
Nou jeh, versjèl moot d'r zien, neet woer. Die mage dus binne de hèkke stoon, oonderwijl 't gewoen volk ziech maag vergape aon al die lui die gèt te zègke höbbe. Dee vaan eus, dao mote v'r gruuts op zien. Dee heet 'n belaankrieke bijdrage gelieverd um dee nuie paol op tied veerdeg te höbbe.

Ouch zeker is tot v'r daornao de brök euver trèkke um eus op te stèlle in Wyck um de Groeten Optoch te loupe.
Iech höb 't geveul tot v'r eus groeter es oets goon prizzentere. De gróp is groeter es oets daoveur. Mèt al die kinder kojtse moot 't 'n manjefieke vertoening weure.
Ederein is behuurlek aon 't fisternölle huur iech hei en daor, dus dat kump allemaol good.

Tjeh en wat die vraoge betröf, iech belaof uuch tot iech uterlek Asselegoonsdag mèt alle antwoorde kom.

In d'n aonloup naor de Vastelaovend wins iech ederein al vas hiel gezèllege daog.

 

Zoondag 10 jannewarie 2016

Nuie Stadsprins 2016 vaan Groet Mestreech.............    

'Ziene Hoegen Hoeglöstegheid Prins Bastiaan I'

lees weier.......

 

Goonsdag 11 november 2015

Nui Mestreechter Vastelaovendsleedsje 2016    

'Confetti'

't leedsje is gesrjeve door Patrick Ummels en Mario Verhoeven en weurt gezonge door De Zes Köp.

Hei oonder de meziek en teks um uuch good veur te bereie op de Vastelaovend.
En neet te lang wachte met perbere want 't sezoen is dees kier erg kort. Laot goon.

Refrein

Iech höb confetti in mie blood
De dreikwaartsmaot in miene voot
’n Dikke zjiem trèk door mien oere
Iech höb e roed geel greun gemood
Dee vastelaovend deit miech good
En miene rikketik dee drejt op volle toere
Zoe gaon iech drei daog laank op weeg
Met gans ’t volk vaan Mestreech

Couplèt

Iech mós lès bij d’n dokter zien iech voolt miech nogalgek
’t Razelde miech vaan mien veuj tot bove in de nek
Heer vroog miech zus heer vroog miech zoe heer duidehei en dao
En nao e paar menute had heer al e antwoord klaor
Heer zag: "Iech weit wat geer mankeert,
’t weurt ins tied tot geer uuch drei daog ammezeert!"

 

Lees hei weier in ut arsjief

 

 

 

   
| oontwerp: rayyar    | © 2010 pumpele paors     | kontak